دەقی وتاری سه‌رۆكی هه‌رێمی كوردستان لە ساڵیادی شۆڕشی مەزنی ئەیلوولدا


KRP.org | |


10/09/2012
به‌ناوی خوای گه‌وره‌ و میهره‌بان

میوانه‌ به‌ڕێزه‌كان

ئاماده‌بووانی به‌ڕێز

هه‌موو لایه‌كتان به‌خێر بێن، سه‌رچاوان

ئیمڕۆ یادی 51 ساڵه‌ی شۆڕشی ئه‌یلوولی مه‌زن ده‌كه‌ینه‌وه‌، شۆڕشی نه‌ته‌وه‌یی و شۆڕشی سه‌رتاسه‌ری، شۆڕشی ئه‌یلوول، شۆڕشی هه‌موو گه‌لی كوردستان بوو، شۆڕشی یه‌ك حزب و یه‌ك لایه‌ن نه‌بوو، به‌ڵام شه‌ره‌فی سه‌ركردایه‌تی و رابه‌رایه‌تی ئه‌و شۆڕشه‌ به‌ر پارتی كه‌وت، به‌سه‌رۆكایه‌تیی بارزانیی نه‌مر، كه‌ ئه‌مه‌ شه‌ره‌فێكی گه‌وره‌یه‌ و شانازی پێوه‌ ده‌كه‌ین هه‌تا هه‌تایه‌.

به‌م بۆنه‌یه‌وه‌ پێش هه‌موو شتێك سڵاوی گه‌رم ده‌نێرم بۆ هه‌موو ئه‌و تێكۆشه‌رانه‌ی كه‌ به‌شداربوون له‌ شۆڕشی ئه‌یلوول و سه‌ری رێز و نه‌وازش داده‌نوێنین بۆ گیانی پاكی شه‌هیدانی شۆڕشی ئه‌یلوول و هه‌موو شه‌هیدانی بزاڤی رزگاریخوازی كوردستان.

شۆڕشی ئه‌یلوول ته‌نیا شۆڕشێك نه‌بوو دژی دیكتاتۆرییه‌ت، شۆڕشێك بوو، به‌ڵێ دژی دیكتاتۆرییه‌ت، به‌ڵام له‌ هه‌مانكاتیشدا دژی نائومێدی، دژی هه‌موو دابونه‌ریتێكی نه‌گونجاو، گه‌وره‌ترین ده‌سكه‌وت به‌لای منه‌وه‌ له‌ شۆڕشی ئه‌یلوول ئه‌وه‌ بوو، كه‌ تاكی كوردی دروستكرد. مێژوویه‌كی تازه‌ی دروستكرد، گه‌نجانێكی دروستكرد كه‌ بڕوایان به‌ خۆیان بێ، تا شۆڕشی ئه‌یلوول كه‌م تاكی كورد هه‌بوو كه‌ هه‌ست به‌ كه‌مایه‌تی نه‌كات به‌رامبه‌ر به‌ خه‌ڵكیتر، به‌ڵام دوای شۆڕشی ئه‌یلوول هه‌موو تاكێكی كورد له‌ هه‌موو كوردستان بڕوایه‌كی وای به‌خۆی په‌یدا كرد، كه‌ بووه‌ جێگه‌ی ئومێدێكی زۆر زۆر گه‌وره‌ و ده‌سكه‌وتی گه‌وره‌یشی به‌دواوه‌ هات، به‌لای منه‌وه‌ ئه‌مه‌ بوو شۆڕشی زۆر گه‌وره‌.

دوای ئه‌وه‌ شۆڕشێكی گه‌وره‌ بوو له‌ڕووی چاكسازی كۆمه‌ڵایه‌تییه‌وه‌، زۆر دابونه‌ریتی ناڕێك و ناگونجاو هه‌بوون، كه‌ شۆڕشی ئه‌یلوول ئه‌مه‌ی نه‌هێشت له‌ ناو كۆمه‌ڵگه‌ی كورده‌واریدا، ئه‌مه‌ش ده‌سكه‌وتیێكی زۆر گه‌وره‌ بوو.

به‌ حه‌ق شۆڕشی ئه‌یلوول دایكه‌ بۆ هه‌موو شۆڕشه‌كانی كه‌ دوای ئه‌وه‌ ده‌ستیان پێكرد، شۆڕشی ئه‌یلوول ئومێدی دا به‌ هه‌موو خه‌ڵكی كوردستان، شۆڕشێك بوو پڕ له‌ پاك و خاوێنی، شۆڕشێك بوو پڕ له‌ مه‌ردایه‌تی، به‌درێژایی شۆڕشی ئه‌یلوول كارێكی دژ به‌ یاسا ئه‌نجام نه‌درا، یه‌ك دیل نه‌كوژرا، كارێكی تیرۆریستی یا تیرۆری نه‌كرا له‌ هیچ كۆییه‌ك له‌ ناو عێراق و نه‌ له‌ ده‌ره‌وه‌ی عێراق، هه‌ر چه‌ند زۆر ئاسان بوو بۆ ئێمه‌ بتوانین زۆر شت بكه‌ین، به‌ڵام شه‌ڕێكی مه‌ردانه‌مان كرد له‌ یاسای نێوده‌وڵه‌تی لاماننه‌دا، له‌ هه‌موویشی گرنگتر به‌ حیكمه‌تی بارزانیی و هاوڕییانی رێكه‌ نه‌درا ببین به‌ شه‌ڕی دوو نه‌ته‌وه‌، ببین به‌ شه‌ڕی كورد و عه‌ره‌ب، كه‌ ئه‌مه‌ش سه‌ركه‌وتنێكی زۆر گه‌وره‌ بوو.

حیكمه‌تی سه‌ركردایه‌تیی شۆڕش له‌ دروشمه‌كه‌یدا، دروشمی مه‌ركه‌زی شۆڕشی ئه‌یلوولدا به‌ ده‌رده‌كه‌وێ، كه‌ ده‌ڵێ: دیموكراتی بۆ عێراق و، ئه‌و سه‌رده‌مه‌، ئۆتۆنۆمی بۆ كوردستان. زۆر راسته‌، له‌ عێراق یا له‌ هه‌ر وڵاتێك ئه‌گه‌ر رژێمێكی دیموكراتی نه‌بێ، هیچ گرفتێكی ئه‌و وڵاته‌ چاره‌سه‌ر ناكرێ.

ئه‌مڕۆش عێراق پێویستی به‌و دیموكراتییه‌ هه‌یه‌، چونكه‌ ئه‌و دیموكراتییه‌ی كه‌ پێویسته‌ به‌داخه‌وه‌ هێشتا نه‌چه‌سپاوه‌، ئه‌و سه‌رده‌مه‌ دروشمی مه‌ركه‌زی شۆڕشی ئه‌یلوول ئه‌وه‌ بوو هه‌روه‌كو باسم كرد، دیموكراتی بۆ عێراق و ئۆتۆنۆمی بۆ كوردستان، به‌ڵام دوای قوربانیدانێكی زۆر، چه‌ند قوربانی ئێمه‌ گه‌وره‌تر بوو، ئه‌وه‌نده‌ داواكاری كوردی زیاتر بوو، كه‌ مافێكی سرووشتی ئێمه‌یه‌، به‌ڵام چۆن ده‌كرێت دوای ئه‌نفال و كیمیاباران و وێرانكردنی هه‌رچی دێهاتی كوردستانه‌، هێشتا ئه‌مڕۆش كه‌سانێك هه‌بن پێیانوابێ، ده‌بێ كورد ئازاد نه‌بێ، ده‌بێ كورد خاوه‌نی بڕیاری خۆی نه‌بێ، ئه‌مه‌ لای من سه‌یره‌!

به‌ڕێزان....

عێراق له‌ دوو نه‌ته‌وه‌ی سه‌ره‌كی پێكهاتووه‌، له‌گه‌ڵ رێزم بۆ هه‌موو نه‌ته‌وه‌كانی تر كه‌ پێكه‌وه‌ ده‌ژین و برای یه‌كترین، به‌ڵام هه‌ر له‌ دوای جه‌نگی جیهانی یه‌كه‌مه‌وه‌، كه‌ ده‌وڵه‌تی تازه‌ی عێراق دامه‌زرا، له‌سه‌ر ئه‌و ئه‌ساسه‌ دامه‌زرا، كه‌ كورد و عه‌ره‌ب شه‌ریكن له‌م وڵاته‌دا، به‌ڵام ده‌وڵه‌تی عێراق هیچ ئیلتیزامێكی نه‌كرد، بۆیه‌ نه‌ عێراق بووه‌ ده‌وڵه‌ت و نه‌كوردیش ئیسراحه‌تی كرد.

ئێمه‌ ئومێدێكی زۆرمان په‌یدا كرد دوای رووخانی رژێم، كه‌ هه‌موو ده‌زانن كورد چ رۆڵێكی سه‌ره‌كی بینی له‌ رووخاندنی رژێمی دیكتاتۆری، دوای ئه‌وه‌ی كه‌ ده‌ستوورێكی رێكوپێك، من ناڵێم بێ كه‌موكوڕییه‌، به‌ڵام تاڕاده‌یه‌كی زۆر ده‌ستورێكی رێكوپێك په‌سه‌ند كرا بۆ عێراق، ئه‌م ده‌ستووره‌ بوو به‌وه‌ی كه‌ به‌هۆی ئه‌وه‌ی ئێمه‌ پێكه‌وه‌ بژین و پێكه‌وه‌ له‌ عێراقی تازه‌دا، عێراقی تازه‌ دروست بكه‌ین.

مێژووی هه‌موو وڵاتانی تر، نه‌ته‌وه‌كانی تر، پیشانمان ده‌دات، نه‌ دابه‌شكردنی به‌ زۆر سه‌رده‌گرێ، نه‌ پێكه‌وه‌ژیانی به‌ زۆر سه‌رده‌گرێ، گه‌لی كوردستان خۆی بڕیاری داوه‌، كه‌ ئێمه‌ پێكه‌وه‌ له‌گه‌ڵ براكانی ترمان له‌ عێراقی تازه‌دا پێكه‌وه‌ ده‌بین، به‌ڵام به‌مه‌رجێك كه‌ عێراق خاوه‌نی ئه‌م ده‌ستووره‌ بێت، كه‌ ئێستا هه‌یه‌تی و به‌داخه‌وه‌ ئیلتیزامی پێناكرێ.

ئه‌م ده‌ستووره‌ وای كردووه‌ ئێمه‌ ئه‌و بڕیاره‌ بده‌ین، ئه‌گه‌ر ئه‌و ده‌ستووره‌ نه‌بێ، بڕیاری ئێمه‌ش، ئه‌و بڕیاره‌ نابێ. كه‌ من ده‌ڵێم: بڕیاری ئێمه‌، مه‌به‌ستم بڕیاری گه‌لی كوردستانه‌، من ئه‌و مافه‌ به‌خۆم ده‌ده‌م به‌ناوی گه‌لی كوردستان قسه‌ بكه‌م، چونكه‌ گه‌لی كوردستان ئه‌و بڕوایه‌ی به‌ من داوه‌.

ئێمه‌ له‌گه‌ڵ عێراقێكی دیموكراتی، فره‌لایه‌نین، عێراقێك بۆنی دیكتاتۆرییه‌تی لێ نه‌یه‌ت، له‌مه‌ودوا ئێمه‌ له‌گه‌ڵ هه‌موو لایه‌نه‌ عێراقییه‌كان تێده‌كۆشین ده‌بێ ده‌ستووری عێراق بچه‌سپێێ، ده‌بێ عێراقی تازه‌ هی هه‌مووان بێ، ده‌بێ شه‌راكه‌تی هه‌موو لایه‌نه‌كان به‌كرده‌یی خۆی ببینێته‌وه‌ له‌و حكوومه‌تی تازه‌دا، به‌هیچ شێوه‌یه‌ك باوه‌ڕناكه‌م هیچ لایه‌نێكی عێراقی رازی بێ تاكه‌ كه‌سێك یان تاكه‌ لایه‌نێك ماف به‌خۆی بدات ته‌نیا بڕیار بدات.

ئێمه‌ ئاماده‌ین هه‌موو گرفته‌كان به‌پێی ده‌ستوور چاره‌سه‌ر بكه‌ین، به‌ڵام ئه‌گه‌ر كه‌سێك وا بیر بكاته‌وه‌، ده‌توانێ به‌ زۆر شت له‌ سه‌ر كوردستان فه‌رز بكات، كه‌سێك وا بیر بكاته‌وه‌ به‌ كه‌ڵه‌گایه‌تی ده‌توانێ ده‌سكه‌وته‌كان له‌ كوردستان بستێنێته‌وه‌، ئه‌مه‌ مه‌حاڵه‌، من ده‌زانم خراپترین شت شه‌ڕه‌، ئه‌وه‌ی بیری لێ ناكه‌ینه‌وه‌ شه‌ڕه‌، به‌ڵام له‌شه‌ڕ خراپتر ئه‌وه‌یه‌ مرۆڤ بكه‌وێته‌ بن حكوومی دیكتاتۆرییه‌ت.

ئێمه‌ هه‌نگاو به‌ره‌و برایه‌تی ده‌نێین، هه‌نگاو به‌ره‌و ئاشتی ده‌نێین، ئێمه‌ هه‌نگاو ده‌نێین به‌ره‌و عێراقێكی دیموكراتی له‌گه‌ڵ هه‌موو لایه‌نه‌كان پێكه‌وه‌ بین هیچ شتێكی شه‌خسی له‌گه‌ڵ هیچ لایه‌نێكدا نیمانه‌، به‌ڵام مه‌حاڵه‌ ئێمه‌ قبوڵ بكه‌ین كه‌سێك ده‌ست بۆ ئه‌م ده‌سكه‌وتانه‌ی هه‌رێمی كوردستان درێژ بكات یا پێوابێ به‌ دروستكردنی باره‌گایه‌كی تازه‌ی سه‌ربازی و یا جوڵاندنی هێزی سه‌ربازی ده‌توانێ كاریگه‌ری له‌سه‌ر ئه‌م ڕه‌وشه‌ بكات. ئه‌مه‌ خه‌یاڵه‌.

پێموایه‌ ده‌بێ زیاتر ئاقڵانه‌ ره‌فتار بكرێ و ئاقڵانه‌ بیر بكرێته‌وه‌، چونكه‌ به‌ شه‌ڕ هیچ كێشه‌یه‌ك چاره‌سه‌ر نه‌كراوه‌ و چاره‌سه‌ر نابێ.

ئێمه‌ وه‌كو كورد، وه‌كو كورد له‌هه‌موو پارچه‌یه‌ك، زه‌مانی ئه‌وه‌ چووه‌ ئێمه‌ هێرشبه‌ر بین، یا بیر له‌ شه‌ڕ بكه‌ینه‌وه‌، به‌ڵام ئێمه‌ ده‌بێ ئاماده‌ بین بۆ ئه‌وه‌ی به‌رگری له‌ خۆمان بكه‌ین، زه‌مانی شه‌ڕ نه‌ماوه‌ و زه‌مانی دیالۆگه‌، زه‌مانی مه‌نتیقه‌، زه‌مانی لێتێگه‌یشتنه‌، زه‌مانی رێز له‌یه‌كتر گرتنه‌، ئێمه‌ ئومێده‌وارین هه‌م له‌ كوردستانی عێراق و له‌ هه‌موو پارچه‌كانی دیكه‌یش هه‌موو گرفته‌كانی گه‌لی كورد له‌گه‌ڵ ئه‌و برایانه‌ی كه‌ پێكه‌وه‌ ده‌ژین له‌ نه‌ته‌وه‌كانی تر چ عه‌ره‌ب چ تورك چ فارس به‌ڕێزله‌یه‌كتر گرتن به‌دیالۆگ ئێمه‌ بگه‌ین به‌ چاره‌سه‌ر بۆ ئه‌و هه‌موو گرفتانه‌.

ئه‌مڕۆش بابه‌تی گه‌رم، بابه‌تی ره‌وشی سوریایه‌. ئێمه‌ له‌گه‌ڵ ئه‌وه‌ین ئه‌وه‌ی میلله‌تی سوریا بڕیاری لێده‌دات، خۆیان مافی ئه‌وه‌یان هه‌یه‌ بڕیار بده‌ن ئاینده‌یان چۆن ده‌بێ، به‌ڵام بۆ ئێمه‌یش زۆر گرنگه‌، ئێمه‌یش بزانین ئاینده‌ی گه‌لی كورد له‌ سوریا چۆن ده‌بێ. تا ئێستا مه‌حروم بوون له‌ مافی هاووڵاتیبوون، مه‌حاڵه‌ نه‌ كوردی سوریا ئه‌مه‌ قبوڵ بكات نه‌ هیچ خاوه‌ن ویژدانێك ئه‌مه‌ قبوڵ بكات، ئه‌گه‌ر هه‌ر گۆڕانكارییه‌ك به‌سه‌ر ره‌وشی سوریادا بێت كورد له‌ هه‌مان ره‌وشدا بمێنێته‌وه‌، خۆیان بڕیاری خۆیان ده‌ده‌ن، نه‌ ئێمه‌ ئه‌و مافه‌مان هه‌یه‌، نه‌ كه‌سی تر ئه‌و مافه‌ی هه‌یه‌ ته‌ده‌خول له‌ ڕه‌وشی ئه‌وان بكات، ته‌نیا ئه‌وه‌یه‌ ئێمه‌ یارمه‌تیان ده‌ده‌ین بۆ ئه‌وه‌ی به‌ مافه‌كانی خۆیان بگه‌ن، به‌ دیالۆگ به‌ لێتێگه‌یشتن، ئێمه‌ سه‌ربه‌رزین له‌وه‌ی توانیمان تاڕاده‌یه‌كی زۆر كێشه‌ی ناوخۆیان یارمه‌تیان بده‌ین و كێشی ناوخۆیان چاره‌سه‌ركه‌ن و ئامۆژگاری ئێمه‌ بۆ ئه‌وان ئه‌وه‌یه‌ كه‌ بگه‌نه‌ لێكگه‌یشتنێك بۆ ئاینده‌ی خۆیان له‌گه‌ڵ میلله‌تی سوریا و له‌گه‌ڵ خه‌ڵكی سوریا و له‌گه‌ڵ هێزه‌كانی سوریا.

ئێمه‌ له‌و بڕوایه‌داین له‌ ناوچه‌ی رۆژهه‌ڵاتی ناوه‌ڕاست هه‌موو ره‌وشه‌كان به‌ره‌و گۆڕانێكی گه‌وره‌ ده‌چن، رۆژ، رۆژی گه‌لانه‌ بۆ ئه‌وه‌ی بڕیاری خۆیان بده‌ن، هه‌رچی گه‌لانی ئه‌م ناوچه‌یه‌ بڕیاری لێبده‌ن، ئێمه‌یش به‌شێكین له‌وان و پشتیوانیان لێده‌كه‌ین.

له‌ كۆتاییدا جارێكی دیكه‌ سوپاسی هه‌موو لایه‌كتان ده‌كه‌م و ئومێده‌وارم شۆڕشی ئه‌یلوول هه‌میشه‌ له‌ یادی هه‌موو تاكێكی كورد بێ و له‌یادی هه‌موو گه‌نجه‌كانی ئێمه‌دا بێت و خه‌ڵكی ئێمه‌ ئه‌وانه‌ی شۆڕشی ئه‌یلوولیان نه‌دیووه‌و نه‌وه‌یه‌كی تازه‌ن و پێگه‌یشتوون بزانن خه‌ڵكانێك ره‌نجیان داوه‌ و خوێنیاندا، هه‌موو شتێكیاندا له‌ پێناو ئه‌وه‌ی كه‌ ئه‌مڕۆ بۆ ئێمه‌ دروست بكه‌ن، بۆیه‌ ده‌بێ قه‌دری خه‌باتی ئه‌وان بزانین.

من لێره‌دا ده‌مه‌وێ به‌راشكاوی بڵێم: له‌مه‌ودوا زۆر به‌توندی به‌رامبه‌ر هه‌ر كه‌سێك له‌ ناوه‌وه‌ یا له‌ ده‌ره‌وه‌ ده‌وه‌ستین كه‌ بیه‌وێ ئه‌م مێژووه‌ بێشوێنێ یا سوكایه‌تی به‌ شۆڕشی ئه‌یلوول و به‌خه‌باتی پێشمه‌رگه‌ بكات.

ئیتر زۆر سوپاستان ده‌كه‌م

زۆر به‌خێربێن





SOURCE:: KRP PAGE HIT:: 1427