هه‌ڤپه‌یڤینا سه‌رۆكێ هه‌رێما كوردستانێ یا ل گه‌ل به‌شا كوردی یا ده‌نگێ روسیا


KRP.org | |


21/02/2013
ده‌نگێ روسیا: برێز جه‌نابێ سه‌رۆك د ده‌ستپێكێ ده‌، ئەم گه‌له‌ك ب خێرهاتنا وه‌ دكن، ب ناڤێ خه‌باتكارێن ده‌نگێ روسیا ل ڤێ سه‌ردانا دیرۆكی ده‌ ئەم سه‌ركه‌فتنێ ژ بۆ وه‌ دخوازین، جه‌نابێ سه‌رۆك به‌ری 60 سالان بارزانیێ نه‌مر مه‌ڵه‌ موستافا بارزانی ده‌رگه‌هێ كره‌ملینا مۆسكۆوایێ دا و گۆت ئەڤه‌ ده‌نگێ نه‌ته‌وه‌یا كورده‌. ئیرۆ هون ب ئاوایه‌كه‌ فه‌رمی وه‌كی سه‌رۆكێ هه‌رێما كوردستانێ سه‌ردانا روسیایێ دكن. گه‌لۆ د ستراته‌ژیا كوردستانێ ده‌، پێوه‌ندیا ل گه‌ل روسیایێ چ جیهه‌ك دگره‌؟

سه‌رۆكێ هه‌رێما كوردستانێ: وێ رۆژا كو جه‌نابێ بارزانیێ نه‌مر ده‌رگه‌هێ كره‌ملینێ دا ئەو رۆژا ده‌ستپێكێ بوو ژ بۆ ڤه‌كرنا ده‌رگه‌هێ كره‌ملینێ و مۆسكۆوا ب روویێ نه‌ته‌وه‌یا كورد. ئیرۆ ئەڤه‌ ژی درێژه‌پێدانا وێ خه‌بات و وێ تێكۆشینێیه‌. بێگوومان هه‌موو ده‌مان هه‌بوویه‌ پێوه‌ندیێن مڵه‌تێ كورد و مڵه‌تێن روسیا و ئەڤ پێوه‌ندی گه‌له‌ك كه‌ڤنن هه‌تا ده‌ما قه‌یسه‌رێ روسیا ئەڤ پێوه‌ندی به‌رده‌وام بوون، و ئەم هێڤیدارین ژ بۆ پاشارۆژێ ئەڤ پێوه‌ندی به‌ره‌ڤ پێشتر بچن و به‌رژه‌وه‌ندیا هه‌ر دو ئالیان ده‌ به‌.

ده‌نگێ روسیا: جه‌نابێ سه‌رۆك بێگومان ژ بلی تێكلیێن دو ئالی، ژ بلی ره‌وشا هه‌رێما كوردستانێ یا سیاسی و ره‌وشا عیراقێ یا سیاسی، گه‌له‌ك بابه‌تێن ناڤنه‌ته‌وی ژی هونێ ل گه‌ل به‌رپرسێن سیاسی یێن روسیایێ ره‌ گوفتووگۆ بكن. ب تایبه‌تی ژی ئەز باوه‌رم كریزا(قه‌یرانا) سوریێ یه‌. گه‌لۆ هون دخوازن چ په‌یامه‌ك ب ناڤێ كوردێن سوریه‌ بگهینن به‌رپرسیارێن روسیا و هون هێڤیا چ هه‌لوه‌سته‌كی ژ وان دكن، ژ بۆ كوردستانا سوریه‌(رۆژاڤا)؟

سه‌رۆكێ هه‌رێما كوردستانێ: بێ شك ئەمێ بیر و بۆچوونێن خوه‌ ئالوگۆر بكین ل گه‌ل سه‌ركردایه‌تیا روسیا ره‌، د ده‌ربارێ هه‌موو بابه‌تان و بێگومان یه‌ك ژ وان بابه‌تان ژی مه‌سه‌له‌یا سوریه‌ یه‌. لێ په‌یامه‌كه‌ دیاركری ژ بۆ كوردێن سوریه‌ توونه‌، لێ بێ شك ئەمێ ئالوگۆریا بیر و باوه‌ریێن خوه‌ بكین، ئەوێ مه‌ دڤێتن ئەوه‌ كو مڵه‌تێ سوریه‌ بریارا چاره‌نڤیسا خوه‌ بده‌ و ئێدی ئەڤ خوین نه‌یێ رێهتن و بلا مڵه‌تێ كورد ژی مافێن خوه‌ شاد ببه‌، نه‌كو بمینه‌ مه‌هروم وه‌كی به‌ری نها.

ده‌نگێ روسیا: ئە‌زبه‌نی پرسه‌كه‌ مه‌ ل سه‌ر ره‌وشا عیراقێ هه‌یه‌، ل 2010 ده‌ وه‌ ده‌ستپێشخه‌ریه‌ك كر و عیراقێ ژ قه‌یرانه‌كه‌ پر دژوار ده‌ رزگار كر، ئیرۆ ئەو ره‌وش دووباره‌ دبه‌ ب ره‌نگه‌كه‌ هێ توژتر، د ناڤبه‌را هه‌رێما كوردستانێ و ده‌ستهلاتا عيراقێ ده‌، د ده‌ربارێ وان مادده‌یا 140 و ده‌ڤه‌رێن ده‌رڤه‌یێ كوردستانێ و یێن دن، ئیرۆ ده‌ما كو هون دوباره‌ ده‌ستپێشخه‌ریه‌كه‌ نوو دروست بكن، گه‌لۆ دێ مافێ كوردان یێن وه‌كی مادده‌یا 140 و پێشمه‌رگه‌، نه‌فت و گاز كو ب له‌ز بێته‌ چاره‌سه‌ركرن هونێ ب چ ره‌نگی و چ مه‌كانزمایه‌ك ژ بۆ وێ دبینن؟

سه‌رۆكێ هه‌رێما كوردستانێ: نها دانوستاندنێن مه‌ به‌رده‌وام دكن، هێزێن كوردستانی و هێزێن عیراقی ژی، ده‌ما كو ئەز ژ ڤر ڤه‌گه‌رم ژی دیسا دێ دانوستاندن و شێورینێن مه‌ ل گه‌ل وان ده‌ به‌رده‌وام ببن. ئە‌مێ ببینن كا چ مومكینه‌ و دكاره‌ چ بێته‌ كرن، هه‌لبه‌ت هه‌ر تشته‌كه‌ نوو بێته‌ كرن و هه‌ر په‌نگاڤه‌ك ده‌ دڤێ هه‌م كێشه‌یا هه‌رێمێ ل گه‌ل به‌خدا و هه‌م ژی كێشه‌یا عیراقێ ب ئاوایه‌كه‌ گشتی بێته‌ چاره‌سه‌ركرن، هه‌ر چه‌نده‌ ل په‌یمانا هه‌ولێرێ ده‌ یا ل سالا 2010 ئەڤ بابه‌ت هه‌موو ل سه‌ر ئيتتیفاق هاتبوو كرن، لێ ئیلتیزاما وێ ب جیهكرنا وێ نه‌هاته‌ كرن. لێ ڤێ جارێ ئەگه‌ر هه‌ر بریار و په‌یمانه‌ك بێته‌ وه‌رگرتن دڤێ ئیلتیزامه‌كه‌ ته‌مام بێته‌ كرن.

ده‌نگێ روسیا: گه‌لۆ هونێ ژ بۆ ب جیهكرنا وان ده‌مه‌كه‌ ده‌ستنیشان بكن؟

سه‌رۆكێ هه‌رێما كوردستانێ: هه‌لبه‌ت یه‌ك ژ وان خالان ژی ئەوه‌ كو دڤێ ده‌م بێته‌ ده‌ستنیشانكرن.

ده‌نگێ روسیا: جه‌نابێ سه‌رۆك جاره‌كه‌ دن ئەمێ ڤه‌گه‌رن ل سه‌ر ره‌وشا عیراقێ، ئیرۆ هه‌رێما كوردستانێ ل عیراقێ ده‌ بێهتر چ هێزه‌كی نێزیكی خوه‌ دبینه‌ كو ل گه‌ل وان ده‌ هه‌ڤپه‌یمانیه‌ك چێ بكه‌؟ ب تایبه‌تی كو پشتی هه‌ڤپه‌یمانیا كورد و شیعی هنه‌كی هه‌ژیا.

سه‌رۆكێ هه‌رێما كوردستانێ: هه‌ڤپه‌یمانیا مه‌ ل گه‌ل گه‌له‌ك هێزان ره‌ هه‌یه‌، هه‌م ل گه‌ل سوننی و هه‌م ل گه‌ل شیعی ژی هه‌یه‌، راسته‌ دبه‌ كو هنه‌ك كێشه‌ و پرسگرێك هه‌بن، لێ به‌لێ ته‌نێ ب ئالیه‌كه‌ شیعی ره‌ هه‌یه‌، نه‌كو هه‌موو شیعی. ژ به‌ر هندێ هه‌ڤپه‌یمانیا مه‌ به‌رده‌وامه‌ و مومكینه‌ ل پێنگاڤێن پێش ده‌ ئەو شاشیێن كو دروستبوونه‌ ژی نه‌مینن.

ده‌نگێ روسیا: جه‌نابێ سه‌رۆك پرۆژه‌یا نشتمانیا كوردی یا ژ بۆ ده‌وله‌ته‌كه‌ كوردی، ژ هشێ تو كورده‌كی ده‌ نه‌چوویه‌، ئیرۆ هه‌رێما كوردستانێ ناڤه‌نده‌ ژ بۆ هه‌موو فكر و هزرا نه‌ته‌وی، ل هه‌ڤدیتنێن خوه‌ یێن ناڤده‌وله‌تی ده‌، گه‌لۆ هون ڤێ پرسێ یا د ده‌ربارێ چاره‌سه‌ركرنا پرسا كورد ل توركیه‌، سوریه‌ و عیرانێ، هون ب چ ره‌نگی به‌رپێش دكن، ب ره‌نگێ پرۆژه‌یا نه‌ته‌وه‌ییا ده‌مدرێژ ئان هه‌ر په‌رچه‌یه‌ك ل گۆر هال و مه‌رجێن خوه‌؟

سه‌رۆكێ هه‌رێما كوردستانێ: هه‌ر پارچه‌یه‌ك ل گۆر ره‌وش و مه‌رجێن خوه‌، ژ به‌ر كو هه‌ر پارچه‌یه‌ك تایبه‌تیه‌كه‌ خوه‌ هه‌یه‌. پرسگرێكێن خوه‌ یێن جوودا هه‌یه‌، واته‌ نه‌ شه‌رته‌ پرسێن وی ل گه‌ل پارچه‌یێن دن بن.

ده‌نگێ روسیا: ئیرۆ ئەڤ په‌نگاڤا كو حكوومه‌تا توركیه‌ داڤێژه‌ دانوستاندنێ ل گه‌ل ئابدوڵاه.ئوجالان دكه‌، ژ بۆ چاره‌سه‌ركرنا پرسا كورد، نێرینا وه‌ یا ل ڤی ده‌رباری ده‌ چیه‌؟

سه‌رۆكێ هه‌رێما كوردستانێ: ئە‌م پشته‌ڤانیێ لێ دكین و ئەم ب په‌نگاڤه‌كه‌ راست و دروست دبینن، ژ بۆ پشته‌ڤانیێ هه‌ر چ ژ ده‌ستێ مه‌ بێ، ئەم ئاماده‌نه‌ بكن.

ده‌نگێ روسیا: جه‌نابێ سه‌رۆك وه‌ هه‌ستا خوه‌ ب گشتی گۆت سه‌باره‌ت ب چالاكیا ئیرۆ، نه‌ ته‌سادوف بوو كو یه‌كه‌م چالاكی ل روسیایێ ڤه‌كرنا ڤێ یادگاریا نه‌مر مه‌ڵه‌ موستافا بارزانی بوو. هه‌ژماره‌كه‌ مه‌زنێ گه‌لێ كورد ل ڤر ژی دژی و ئەڤ هه‌ژمار جارنان هنه‌ك گلی و گازندان دكن، دبێژن ئەم بێ خوه‌دی نه‌، براستی ژی زمانێ خوه‌ ژی وه‌ندا دكن، ژ بۆ چ حكوومه‌تا هه‌رێما كوردستانێ پشتگریا كولتوری ناده‌ كوردێن سۆڤیه‌تێ، وه‌كه‌ ناڤه‌نده‌كه‌ كولتوری كو جه‌ژن و داب و نێریتێن وان وه‌ره‌ ڤه‌ژاندن. پرۆژه‌یه‌ك هه‌یه‌ كو حكوومه‌تا هه‌رێما كوردستانێ پشتگریا كولتورا كوردێن روسیایێ بكه‌؟

سه‌رۆكێ هه‌رێما كوردستانێ: هه‌لبه‌ت دڤێ بێته‌ نرخاندن، كا چ پێویسته‌ بێته‌ كرن، چ مومكینه‌ و چاوا بكن. كا كورد ب خوه‌ وێ چاوا خوه‌ ب رێك بێخن، كی وێ ته‌مسیلا وان بكه‌، ئەمێ ل گه‌ل كی ته‌ره‌ف بین، ئەم نكارن یه‌ك ب یه‌ك دیار بكن، ژ به‌ر هندێ ئەگه‌ر تشته‌ك وها ببه‌، مه‌ پر پێ خوه‌شه‌ پشته‌ڤانیێ بكین.

Ji bo temaşekirina video ya vê hevpeyvînê ji kerema xwe li ser vê nivîsê bitikînin...





SOURCE:: KRP PAGE HIT:: 1013