وتاری سه‌رۆك بارزانی له‌ ئاهه‌نگی په‌نجاو نۆ ساڵەی دامەزراندنی یەكێتی لاوانی دیموكراتی كوردستان


KRP.org | |


19/02/2012
بەناوی خوای گەورە و میهرەبان

خوشك و برایانی بەڕێز

لاوانی خۆشەویست

ئامادەبووای بەڕێز

پێشەكی سوپاسێكی بێ پایانتان دەكەم بۆ بانگهێشتكردنم بۆ بەشداریكردنم لەم یادە پیرۆزەدا و پیرۆزباییەكی گەرمتان لێدەكەم بۆ ئەم یادە پیرۆزە كە تێپەڕبوونی 59 ساڵە بەسەر دامەزراندنی هەردوو یەكێتیە خۆشەویستەكەمان، یەكێتی لاوان و یەكێتی قوتابیانی كوردستان، هەروەها لاوانی خۆشەویست پیرۆزباییتان لێدەكەم، بەبۆنەی وەرگرتنتان وەك ئەندامی هەمیشەیی لە یەكێتی لاوانی دیموكراتی جیهانی، كە ئەمەش هەنگاوێكی زۆر زۆر گرنگەو نیشانەی ئەهمیەتی ئێوەیەو پێشڤەچوونی ئێوەیەو نیشانەی خەبات و تێكۆشانی ئێوەیە و دەستخۆشیتان لێدەكەم.

هەروەكو جەنابی بارزانیی نەمر وەسفی ئێوەی كردووە، ئێوە شورای پۆڵایین و سەرەڕمن و ئینشائەڵڵا هەر دەمێنن و هەمیشە قوتابیانی خۆشەویستمان سەرەڕم دەبن لەبزووتنەوەی رزگاریخوازیی گەلی كوردستانداو ئێوەش لاوانی خۆشەویست شورای پۆڵایین دەبن بۆ دەستكەوتەكان.

رۆڵی ئێوەی خۆشەویست چ لاوان چ قوتابیان لە شۆڕشی ئەیلوول، لەشۆڕشی گوڵان، لە هەموو بزووتنەوەی رزگاریخوازیی گەلی كوردستاندا رۆڵێكی بەرچاو و كاریگەرەو شەهیدی قارەمانی زۆرتانداوە لەپێناو كوردو كوردستاندا، بۆیە دەبێ هەمیشە لەبەر چاوتان بێت و لەیادتان بێت، كە رۆڵی ئێوە و ئەركی ئێوە بەردەوامە و بەند نییە بەماوەیەكی دیاریكراو، بەڵكو ئێستا ئایندەیەكی گەش چاوەڕوانی گەلی كوردستان دەكات و ئەركە قورسەكەش چاوەڕوانی ئێوە دەكات و دەكەوێتە سەرشانی ئێوە، بۆیە دەبێ خۆتان بۆی ئامادە بكەن.

هەروەكو بەڕێزتان ئاگادارن ئینشائەڵڵا لەم نزیكانە كابینەی حەوتەم دەستبەكار دەبێت و ئومێدەوارین دەسكەوتی گەورە بۆ گەلەكەمان بەدەست بهێنێت. من دڵنیام كە ئینشائەڵڵا سەركەوتوو دەبێت و بەم بۆنەیەوە دەمەوێ سوپاس و ستایشی خۆم ئاراستەی كابینەی شەشەم بكەم بۆ ماندووبوونیان و ئەركەكانیان.

ئێمە پێمان خۆشە كابینەی حەوتەم هەموو لایەنەكان بگرێتەوە و هەوڵیش دراوە و بەردەوامیش دەبین، بەڵام بێگومان كابینەكە تەشكیل دەكرێت، پێمان خۆشە هەموو لایەك بەشداربن، بەڵام ئەوەیش نەیەوێ بەشداربێت، ئێمە رێز لە بۆچوونی دەگرین لەبڕیاری خۆیدا.

من بەدڵنیاییەوە پێتان دەڵێم، ئێمە بەردەوام دەبین لەسەر بەرنامەی چاكسازی و زۆر شتیش كراوەو ئومێدەوارم پێش ئەوەی ساڵێك بەسەر ئەو بەڵێنەدا بڕوات كە بەخەڵكی كوردستانماندا، بەشێوەیەكی تێروتەسەل عەرزی هەموو لایەك بكەین، كە چی كراوەو بۆ ئاییندەش چی دەكرێت. چاكسازی بەندنییە بەوەی كەسانێك دەیانەوێ، ئەمە پرۆسەیەكی بەردەوامە، ئاسان نییە، بەڵام كۆسپی زۆر گەورەش لادراوە لەسەر رێگا، خۆمیش بەشەخسی زۆر بە جدی موتابەعەی دەكەم و بەردەوامیش دەبین و بەدڵنیاییەوە ئەنجامی زۆر باشی دەبێت.

ئێمە دەمانەوێ ریزەكانمان تەبابێت، لای من زۆر زۆر گرنگە ماڵی كورد رێك بێت و یەكڕیزبین و یەكهەڵوێست بین. حەزدەكەم پێشتان بڵێم، كە من سەرۆكایەتی هەرێمم قبووڵكرد، بۆ ئەوە نەبوو بڵێین ببیننە سەرۆكی هەرێم، من چونكە لەو پێگە رەنگە مرۆڤ بتوانێ رۆڵێكی زیاتر ببینێ، من چەند خاڵێكم وەكو ستراتیژیات لەبەرچاوی خۆم دامنابوو:

یەكەم: ئاسەواری شەڕی خۆكوژی لەناو كورد نەهێڵم و جارێكی دیكە خوێنی رۆڵەی كورد بەدەستی كورد نەڕژێ، ئەم وڵاتە ببێت بە وڵاتی موئەسەسات، پێگەیەكی دیپلۆماسی شایانی خەباتی ئەم میللەتە بێت، بۆ ئەم میللەتە بەدەست بهێنین. زمانی نووسین و خوێندنی یەكگرتوو بۆ گەلی كوردستان دروست بكرێ. بەلای منەوە ئەمە هەنگاوێكی زۆر زۆر گرنگ بوو، زۆر زۆر پیرۆزەو دەزانم ئەمە دەبێت كەسانێكی پسپۆڕ ئیشی بۆ بكەن، زۆر زۆریش خەریكین و ئینشائەڵڵا ئەوەش دەبێ خەڵكانێك دەستنیشان بكرێت بۆ ئەوەی دەست بەكاربن و ئیش لەو پرۆژەیەدا بكەن، چەند وەختیشی بوێت، بەڵام ئەنجام ئێمە دەبێ خاوەنی یەك زمان بین.

خاڵی دیكەش ئەوەبوو كە چ لە تەمەنی خۆماندا چ نەوەی دوای ئێمە زەمینە خۆش بكرێ وەكو نەتەوەیەك بەمافی رەوای خۆمان بگەین. من سەربەرزم كە زۆر لەو ئامانجانە بەدەستهاتوون لە هەموویشی گرنگتر لای من ئەوەیە، ئێستا كوڕی كورد، كچی كورد خۆی بە كەم نابینێ بەرامبەر خەڵكی دیكە.

جاران گەنجانی ئێمە نەدەوێران یان پێیان شەرم بوو ئەگەر لەوڵاتێكی دیكە یا شوێنێكی دیكە بیانگوتبا: ئێمە كوردین، بەڵام ئەمڕۆ بەسەربەرزییەوەو بەسینگ دەرهێنانەوە دەڵێت: من كوردم. بۆیە لێرەدا دەبێ سوپاسی خوای گەورە بكەین و بزانین ئەمە لەسایەی خوێنی شەهیدانە.

دەمەوێ كورتەیەكیش لەوەزعی هەرێم و بەغداشتان باس بكەم، ئێمە بەراستی ئێستا چاوەڕوانی ئەو كۆنگرەیەین كە جەنابی سەرۆك كۆمار داوایكردووە، بۆ ئەوەی بزانین و ئومێدەوارین ئەو كۆنگرەیە بە ئەنجامێكی باش بگات، بۆ ئەوەی ئێراق لەو قەیرانە دەربچێت. ئێمە هەموو هەوڵێكماندا وەكو هەرێم كە هاوكاربین بۆ چارەسەركردنی كێشەكانی بەغداو بەردەوامیش دەبین، بەڵام لەهەمانكاتیشدا دەبێ ئەو رێككەوتنەی كە بوونە بنەما بۆ پێكهێنانی حكوومەتی ئێستای ئێراق، دەبێ جێبەجێ بكرێ، رێككەوتننامەی هەولێر یا پێشدەستخەری هەولێر ئەوە نەبوو حكوومەت تەشكیل بكرێ و تەواو، ئەو حكوومەتە لەسەر چەند بنەمایەك لەوانە: جێبەجێكردنی ماددەی 140، مەسەلەی پێشمەرگە كە ئەمە چەند ساڵە غەدر دەكرێ و بودجەی پێشمەرگە دەستی بەسەردا گیراوە، گەڕانەوەی هاوسەنگی بۆ دامودەزگا، بەتایبەتی دامودەزگا سەربازی و ئەمنییەكان، لەسەرووی هەمووشیان مەسەلەی ئیلتیزام بە دەستوورو شەراكەی راستەقینە لەحوكم.

ئەمانە بنەمابوون كە حكوومەت لەسەریان پێكهاتووە، حكوومەت تەشكیل بووەو ئەو رێككەوتننامانە بەلاوەنراوە.

ئێستا كێشەیەكی دیكە هاتۆتە پێش كە بووەتە قەیرانێك، ئەویش مەسەلەی تاریق هاشمی لەگەڵ حكوومەت یان بڵێین لەگەڵ سەرۆك وەزیران، هەرگیز ئەمە كێشەی ئێمە نەبووە، بەڵام ئەخلاقی كوردەواری فەرز دەكات وەختێ یەكێك بێتە لای تۆ دەبێ ئیحترامی بگریت، ئەمە دوو لایەنە، لایەنێكی قەزائیە، لایەنێكی سیاسییە، لایەنی قەزائی دەبێت بۆ قەزا بەجێ بهێندرێ لە قەزا چ بڕیارێك بدرێ ئەوە جێبەجێ بكرێ، لایەنی سیاسی، من پێموایە باشترین چارەسەر ئەوەیە جەنابی سەرۆك كۆمار، جەنابی سەرۆكی ئەنجوومەنی وەزیران، جەنابی سەرۆكی پەرلەمان، لەگەڵ سەرۆكی كوتلەی ئێراقیە دابنشن بڕیارێك لەم مەوزوعە بدەن، با هەموو شتێك لەبەرچاو بگرن، ئاییندەی ئێراق، مەسەلەی شەراكەت، هەڵوێستی هەموو لایەنەكان و هەر بڕیارێك بدەن هەرێمی كوردستانیش پابەندی ئەو بڕیارە دەبێت و ئێمە تەرەف نین لەم كێشەیەدا، خەڵكانێك دەیانەوێ بەزۆر رامانكێشن وابكەن، بەڵام لەراستیدا بەمشێوەیە كە ئێستا ئەمە چارەسەر نییە بۆ ئەم كێشەیە، بەپێچەوانەوە مومكینە ئەو كێشەیە زۆر زۆر گەورەترو خراپتر بكات.

خاڵی دیكە، من دەمەوێ ئیشارەتی پێبدەم، ئەم رەوشەی لەسووریا هەیە، رەوشی سووریا راستەوخۆ كاریگەری دەبێ لەسەر ئێمە، لەوەی هاوسنوورین، پاشان ژمارەیەكی ئێجگار بەملیۆنان كورد هەیە لەسووریا، بێبەشن لەهەموو مافێك، بێبەشن لەوەی هەتا هاووڵاتیبوون، هاووڵاتیش نین، وەسفەكەیان وا دەكرێ: میوانن، موهاجرن، موتەسەلیلن هەر ئاوها وەسف دەكرێن، یانی هاووڵاتی نین یا میوانن یا موهاجرن بە عەرەبی پێیدەگوترێ موتەسەلیل. بەنیسبەت ئێمە زۆر گرنگە كە هەموو ناوچەیەكی رۆژهەڵاتی ناوەڕاست، نەك هەر ناوچەی رۆژهەڵاتی ناوەڕاست، بەڵكو لەجیهاندا گۆڕانكارییەكی گەورە بەرێگاوەیە، ئێمە وەكو كوردو كوردستانی دەبێ خۆمان ئامادە بكەین، دەبێ ئامادەبین بۆ ئەو گۆڕانكاریانە، یەكێك لەوانە، ئەو گۆڕانكارییە لە سووریا دەبێت و حەتمەن روو دەدات.

هەر گۆڕانكارییەك بێت، ئەمە كاری خودی خەڵكی سووریایە، میللەتی سووریا، ئیشی ئەوانە رژێم بگۆڕن، نەیگۆڕن، بەڵام بۆ ئێمە گرنگە ئاییندەی میللەتی كورد لەوێ چی دەبێت؟ ئایا هەر موهاجیرو میوان و موتەسەللن یان دەبنە هاووڵاتی خاوەن ماف، ئێمە پشتگیری لەوە دەكەین ببنە خاوەنی مافی خۆیان و خۆیان بڕیار بدەن، چۆن رێكدەكەون، لەسەر چ بنەمایەك، ئێمە پشتگیرییان لێدەكەین و بەرگریشیان لێدەكەین.

لەكۆتاییدا من جارێكی دیكە پیرۆزباییتان لێدەكەم و داوای سەركەوتنتان بۆ دەكەم و داواشتان لێدەكەم جارێكی دیكە باش گوێ لەم قسەی من بگرن و خۆتان ئامادەبكەن بۆ ئاییندەیەكی گەش، ئینشائەڵڵا.






SOURCE:: KRP PAGE HIT:: 1077