سەرۆکی هەرێمی کوردستان: كیمیابارانی هەڵەبجەو ئەنفال بوونە هۆی ئەوەی گرێی بەختی كورد بكرێتەوە


KRP.org | |


14/03/2013
بەناوی خوای گەورە و میهرەبان

میوانانی بەڕێز

ئامادەبووانی بەڕێز

بەناوی گەلی كوردستان وبەناوی خۆمەوە بەخێرهاتنێكی گەرمتان دەكەم وسوپاستان دەكەم كە زەحمەتتان كێشاوە و تەشریفتان هێناوە بۆ ئەوەی بەشداریی گەلی كوردستان بكەن لەیادی تێپەڕبوونی 25 ساڵ بەسەر كارەساتی دڵتەزێنی ئەنفال دا. بەشداربوونی ئێوەی بەڕێز ئومێد بەگەلی كوردستان دەدات بەوەی كە بەڵێ گەلی كوردستان بێ دۆست نییە. یادكردنەوەی ئەمساڵ وەكو ساڵانی پێشتر نییە، ئەمساڵ ژمارەیەكی زۆر لە كەسایەتییە ناودارەكانی جیهان ئامادەن، زۆر لە دۆستان ئامادەن و لەهەوڵی ئەوەدان بۆ ناساندنی جینۆسایدی كورد لەسەر ئاستی جیهان. بۆیە ئەمە بۆ ئێمەی خەڵكی كوردستان دڵخۆشكەر وئومێدبەخشە، من لێرەدا بە پێویستی دەزانم سوپاسی بێپایان بنێرم بۆ ئەو كەسانەی كە لەكاتی خۆیدا ئەوەی توانایان هەبوو یارمەتیی ئێمەیان دا، هەروەها ئەو دەوڵەتانش كە یارمەتیی ئێمەیان دا و دەرگایان بۆ خەڵكی كوردستان كردەوە كە لەقڕكردن ڕزگاریان بوو.

بەڕێزان

كارەساتی ئەنفال كارەساتێكی زۆر گەورەیە و برینەكان زۆر قووڵن، ئەنفال نەك بڵێین لە ساڵی1988 دەستیپێكرد، بەڵام لەو ساڵەدا گەورەترین پرۆسەی ئەنفال دەستیپێكرد ئەگینا لەساڵی 1975ـەوە ئەنفال دژ بەگەلی كوردستان دەستیپێكرد، هەر لەڕاگواستن وبەعەرەبكردنی هەموو ناوچەكان و وێرانكردنی 4500 گوند و بێسەروشوێنكردنی 12 هەزار فەیلی و 8 هەزار بارزانی تا گەیشتە بێسەرو شوێن كردنی 182 هەزار كەس بەداخەوە تائێستا نەمانتوانیوە جگە لەڕوفاتی نزیكەی 3 هەزار كەس بدۆزینەوە و ئەوانی دیكەمان هێشتا نەدۆزیوەتەوە وئەو 3 هەزار كەسەشمان هێنایەوە زێدی باووباپیرانیان لە كوردستان وتاماویشین بەدوای ئەوانی دیكەدا دەگەڕێین. ئەمەش ئەركی حكوومەتی هەرێمی كوردستان و هەموو مرۆڤدۆستێكە كە یارمەتیمان بدەن بۆ دۆزینەوەی ئەو ڕووفاتانەی ماون وهێنانەوەیان لە بیابانەكانی خوارووی عێراق.

ئەمە نیشانیدەدات ئەو تاوانانە تاوانی ڕێكخراو و بە بەرنامە بوون بۆ قڕكردنی نەتەوەیەك، ئەمە ڕەنگدانەوە نەبووە بۆ پرۆسەیەكی سەربازی، بەڵكو بەرنامەیەك بووە بۆ نەهێشتنی كورد و كوردستان، بەڵام كاتێك خەڵكی كوردستان لەڕاپەڕینی بەهاری ساڵی 1991 دا سەركەوت بەرەو تۆڵەسەندنەوە نەچوو، هەمان ئەو سەربازانەی لەكوردستان بوون وئەنفالیان كردین ودێهاتی ئێمەیان وێرانكرد خەڵكی كوردستان میواندارییان كردن و بە ڕێزەوە بۆ ئەو شوێنەی خۆیان ویستیان بەڕێیان كردن. لێرەدا من گوتوومە و هەمیشە بەپێویستی دەزانم بیڵێم : من شانازی بەوە دەكەم كە تاكێكم لەگەلی كوردستان، بەڵام دواتر چەند بەرابەر بۆ من جێگەی شانازی بووە كە تاكێكم لەو گەلەی خاوەنی ئەو ڕەوشتە بەرزەیە.

بەڕێزان ....

بەڵێ ئێمە ئەوە دەزانین حكوومەتی ئێستای عێراق لەو تاوانەی بەرامبەر گەلی كوردستان كراوە بەرپرسیار نییە، بەڵكو ڕژێمی دیكتاتۆریی ڕووخاو تاوانبارە، بەڵام بەرپرسیارێتیی یاسایی حكوومەتی عێراقە و ئەمە بەرپرسیارێتییەكی هەتا هەتاییە كە بڕیاری پەرلەمانی عێراقیش كە بەجینۆساید ناساندنی تاوانەكانی دژ بەگەلی كوردە دەبێ جێبەجێی بكات وبەرپرسیارێتیی خۆی بەجێبهێنێت، چونكە ئەم كارەساتە ئەوەندە قووڵە كاریگەریی دەروونیشی بەسەر نەوەكانی داهاتوو دەبێت. ئەمەش كار وقەرەبۆكردنەوەی گەلی كوردستانی دەوێ، هەروەها بەرپرسیارێتیی نێونەتەوەییش لەو دەوڵەتانەی كە تیایایاندازۆر لە كۆمپانیاكان یارمەتیی ڕژێمی دیكتاتۆرییان دا بۆ دروستكردنی چەكی كیمیایی، ئەو چەكەی كە بەچەند چركەیەك 5 هەزار ژن ومنداڵی هەڵەبجەیان شەهیدكرد، ئەمەش بەرپرسیارێتییەكی گەورەیە، كارەساتەكە لەخۆیدا گەورەبوو، بەڵام گەورەترینیان لەهەڵەبجە كرا، لەشارێكی وەكو هەڵەبجە 5000 كەس بەغازی خەردەل و غازی دیكە هەموویان شەهیدكران. ڕاستە تاوانێكی گەورە وزەرەرێكی گەورەش بوو، بەڵام لەوەدەچێت كیمیابارانی هەڵەبجەو ئەنفال بوونە هۆی ئەوەی گرێی بەختی كورد بكرێتەوە و دونیا چاوی بكاتەوە و چیدیكە نەڵێن ئەمە كێشەیەكی ناوخۆییە و پەیوەندیمان پێوە نییە، دەرگا بۆ ئەوە كرایەوە سنوورێك بۆ دیكتاتۆری عێراق و زۆر دیكتاتۆری دیكە لەشوێنی دیكەی جیهان دابندرێت. ئومێدەوراین ئەم سیاسەتە بەردەوام بێت و لەهیچ شوێنێكی دونیا دیكتاتۆران نەتوانن میللەتی خۆیان قڕبكەن و وڵاتانی دیكەی جیهان زەقاوزەق تەماشایان بكەن و بڵێن ئەمە كێشەیەكی ناوخۆییە و ئێمە دەستی تیادا وەرنادەین. داوا لەحكوومەتی هەرێمی كوردستان دەكەم و دەستخۆشییان لێدەكەم لە هەموو دامودەزگا و هەموو ئەو برایانەی زەحمەتیان كێشاوە بۆ سازدانی ئەم كۆنفڕانسە لەگەڵ هەموو دۆستانمان لە دەرەوە كە بەهەموو شێوەیەك خەریك بن بۆ هەر هەنگاوێكی پێویست بۆ بەجینۆسایدناساندنی ئەو تاوانانەی لەدژی كورد كراوە لەسەر ئاستی جیهان، دیارە ئەمەش هەنگاوی یاسایی زۆری دەوێت ودەبێ سوود لە تواناو پشتگیریی دۆستانمان وەربگرین لەدەرەوە و حكوومەتی هەرێمی كوردستانیش بە هەموو توانایەكەوە خەریك بێت، دەستخۆشیی هەموو ئەو هەوڵانەش دەكەین و سوپاسیان دەكەم ئەو دۆستانەی ئێمە كە هەوڵیان داوە ئەو كارەساتە بە جینۆساید بناسێنن تا ئاستێكی زۆریش پێشكەوتن بەدەستهاتووە، بەڵام دیارە زۆری ماوە كە ئەو كارەساتە بەجینۆساید بناسرێت.

نابێ رابردوومان لەیاد بچێت

پەیامی من بۆ گەلی كوردستان ئەوەیە كە ئێمە دەبێ ڕابردوومان لەیاد نەچێت، بەڵام وانەبێت بۆ ڕق وكینە و تۆڵە سەندنەوە بێت، ئێمە دەبێ لەسەر ئەو فەرهەنگە جوانەی خۆمان بەردەوام بین، فەرهەنگی لێبووردەیی و پێكەوەژیان ویەكتر قبووڵكردن.

قوربانییەكانی ئێمە لەپێناوی كێشەی گەلێك بووە بۆ كێشەیەكی تایبەتی نەبووە، بەڵام بەدلنیاییەوە دەڵێم ئەو ڕۆژە ڕۆیشت كە جارێكی دیكە گەلی كوردستان تووشی ئەنفال ببێتەوە ئەو ڕۆژە ڕۆیشت كە جارێكی دیكە كەسێك جورئەت بكات ئەو ڕەفتارە لەگەڵ گەلی كورد بكاتەوە و غەدری لێبكات.
دوای ئەو هەموو قوربانیانە ئایا كەسێك هەیە پێشبینیی ئەوە بكات ئێمە جارێكی دیكە قبووڵبكەین بڕیاری خۆمان بەدەستی خۆمان نەبێت ولەم وڵاتەدا بەئازادی نەژین؟ من حەزدەكەم زۆر بە ڕاشكاوی بڵێم ئێمە ئەو هەموو قوربانییەمان دا بۆ ئەوەی لە وڵاتی خۆماندا بە ئازادی بژین ودەبێ بەئازادیش بژین.

ئایندەیەكی گەشمان لە پێشە من ئاسۆ بە ڕوونی دەبینم وئایندەیەكی گەشمان لەپێشە وئێمە یەك هەنگاویش بەرەو پاش پاشەكشە ناكەین وبەرەو پێشەوە دەچین وپەنا بەخوا كوردستان دەبێت مایەی سەركەوتن وخێروخۆشی بۆ هەموو عێراق و ناوچەكەش.

قەیرانێك هەموو عێراقی گرتۆتەوە

لەبارەی بارودۆخی عێراقەوەش بەداخەوە ئەمڕۆ عێراق بەقەیرانێكی جیددیی سەرتاسەری تێدەپەڕێت، هەر ئەوە نییە لەنێوان هەرێم وبەغدا بێت نەخێر، قەیرانەكە هەموو عێراقی گرتۆتەوە و من نامەوێ زۆر كاتی ئێوەی بەڕێز بگرم وبۆنەكەش هی ئەوە نییە من بچمە نێو هەموو وردەكارییەكانەوە، بەڵام پێویستە ئەوە بڵێم كە عێراقی تازە دروستبوو كورد ڕۆڵێكی جیدیی لەدروستكردنەوەی هەبوو و كورد خوێنی لەپێناوی دا ولەسەر ئەو بنەمایە بووە كە ئێمەی خەڵكی عێراق بەبێ جیاوازی هەموومان شەریكین لەم وڵاتە و پێكەوە عێراقێكی تازە دروستدەكەین، ئەمە بنەمای سەرەكی بوو، دەستوورێكمان دانا كە بەشی هەرە زۆری خەڵكی عێراق دەنگی بۆ دا و بەهەموو كەموكوڕییەكانییەوە دەستوورێكی نموونەیی بوو كە ئەرك و مافی هەموو لایەكی دەستنیشان كردووە.

ئەم قەیرانەی ئێستا عێراق پێیدا تێدەپەڕێت هۆی سەرەكیی پابەندنەبوونە بەم دەستوورە وبۆ دەربازبوون لەم قەیرانە تەنها ڕێگە جێبەجێكردنی ڕێككەوتننامەی هەولێری ساڵی 2010 و ڕێككەوتنەكانی دیكەیە كە ئەمە نەخشەڕێگایە بۆ دەربازبوونی عێراق لەقەیرانەكە.

ئایا ئێمە هاوبەش و هاوپەیمانین

لەبارەی گەلی كوردیشەوە من حەزدەكەم زۆر بەڕاشكاوییەوە بڵێم ئەم پرسیارە بۆ برایانی خۆمانە لەعێراق : ئایا ئێمە هاوبەش و هاوپەیمانی یەكترین یان نا؟ ئەگەر هاوبەشین ئەوەی تا ئێستا بووە هاوبەشی نییە، ئەگەر پاشكۆیەتی و وەسایەت بێت ئێمە هیچ پاشكۆیەتی و وەسایەتێك لەكەسەوە قبووڵناكەین.

ئینجا بەڕاستی من وگەلی كوردستان وەڵامی ئەو پرسیارەمان دەوێ،ئایا ئێمە هاوپەیمان وهاوبەشین ؟ ئەگەر وەڵامەكە بەڵێ بێت ئەوا ئێمە بەڵێنی بێ عەمەلمان ناوێت وبەكردار دەمانەوێ، چونكە لەبەڵێنی بێ عەمەل ماندوو بووین ئەگەرنا پاشان هەركەسێك دەزانێ ڕێگەی خۆی چۆن دەبێت. ئێمە پێمانخۆشە هەموو بەیەكەوە بۆ دەستوور وپێكەوەژیان وقبووڵكردنی یەكتر بگەڕێینەوە و ئەو عێراقەی خوێنمان بۆی دا كە عێراقێكی فیدراڵی دیموكراتە و پێكەوە خەریك بین ئەو عێراقە دابمەزرێنین وگەلی عێراق لەم هەموو مەینەتییە ڕزگاری ببێت. من نامەوێ لەمە زیاتر بچمە نێو وردەكارییەكانەوە تەنها جارێكی دیكە بەخێرهاتنێكی گەرمی هەموولایەكتان دەكەم زۆر بەخێربێن وهیوادارم پەنا بەخوا كاتێك خۆش لەكوردستاندا بەسەر دەبەن وهاتنی ئێوە زۆر بۆ ئێمە ئومێد بەخشە.

زۆر سوپاستان دەكەم و بەخێربێن.





SOURCE:: KRP PAGE HIT:: 911