ده‌قی وتاری سه‌رۆكی هه‌رێمی كوردستان له‌ كردنەوەی كۆنگرەی چوارەمی پارتی دادو گەشەپێدان


KRP.org | |


30/09/2012
ب ناڤێ خودێ مەزن ودلۆڤان

بەڕێز رەجەب تەیب ئەردۆگان سەرۆكێ وەزیران و ڕابەرێ ئاك پارتی،

ئەندامێن چارەمین كۆنگرا ئاك پارتی

مێهڤانێن بەڕێز.

سوپاسیا وە دكەم بۆ داوەتكرنا مە ژبۆ بەشداریكردنێ ل ڤێ كۆنگرێ وهیڤیا سەركەفتنێ بۆ كۆنگرا وە دكەین، ئەم هەمی چاوەڕیێ بڕیارێن گرنگ دكەین كو ل ڤێ كۆنگرێ دەربچن.

ل دەمێ كو ئاك پارتی دەسهلاتێ گرتیە دەست پشتێ هەلپژارتنێن توركیا ئەم دبینین توركیا روژ ب ڕۆژ پێ دهاڤێتە قوناغێت بڵندتر وگرنگتر، ئەڤرو توركیا سەنگەكا دیا هەی ل ئاستی نێڤدەوڵەتی وهەروەها ناوچەییش.

ئەم هەمی دزانین كو ناوچا مە ئاریشەیێت هەی، ئەمما هیچ ئاریشەك نییە كو قابیلی چارە نەبی ب مەرجەكێ كو ئیرادا چارەسەرییا ڤێ ئاریشەیێ هەبی. بومە جهێ داخەكا یەكجار یەكجار زۆرە چ خوینا خۆرتەكێ تورك یان خۆرتەكی كورد یان خۆرتێ هەر میللەتەكێ دی بێتە ڕیتن، ئەم میللەتێت كو ل ڤێ دەڤەرێ دژین پێدڤیە ئەم دەستێ برایەتی بۆ ئێك ودوو درێژ بكەین وحەیفا خوینا یەك و دوو بڕێژین.

سیاسەتا پارتا وە و ڕێبەرا وە ئەم دبینین كو سیاسەتەكا ڤەكری، سیاسەتەكا ڕاستە ژ بو چارەسەریا هەمی ئاریشا، من دڤێ ئەز لێرە سوپاسیا بەڕێز ئەردوگان بكەم بۆ ئەو جورئەتە كو نیشاندایی چ ڕۆژا كو چووی بو دیاربەكر وگوت: بەڵێ لازمە كو ئاریشەیی برایێ مەیێ كورد بێتە چارەسەركردن یان كو پار سەردانا مە كری وئەم دلخۆش كری ل هەڤلێرێ و گوت: ئەو ڕۆژ چوو كو ئینكارا هەبوونا میللەتێ كورد دێ هاتیە كرن.

بەرامبەر ڤێ، ئەز دبینم فەرز ژ سەر هەمی كوردا پشتەڤانیا ل ڤێ سیاسەتێ بكن و لازمە هەمی هێزێن كوردی خۆ ل توند و تیژی دوور بئێخن چونكە توند و تیژی چ ئەنجامەكێ بۆ نییە.

هێزا هەر دەوڵەتەكێ یان هەر حزبەكێ نە ب هەندێ دایە كو چەند عەسكەرێ هەی یان چەند چەكێ هەی، هێزا وێ ل وە دایە چەند خزمەت بو میللەتێ خوە كریە وچ بەرنامەك ل دەستە وێ دایە، هێزا ئاك پارتی و هێزا بەڕێز ئەردۆگان د وێ بەرنامەیێ و سیاسەتا ڤەكری دا چ بەرامبەر ئاریشەیێت ناوخۆ چ بەرامبەر دەرڤە كو ل مەیدانێدا ئیسپات كری.

بۆ دوماهی ئینان ب خوین رێتنێ وتوند و تیژیێ ئەم حازرین بۆ هەمی پشتەڤانییەكا سیاسەتا بەڕێز ئەردوگان و ئەم هیڤیدارین كو هەر چی زووتر ئینشائەڵلا ئەڤ ئاریشەیە دوماهی پێ دێت.ڕێكا ئاشتی، ڕێكا برایەتی، ڕێكا لێكتێگەیشتنی تەنها ڕێكە بۆ چارەسەرا هەمی ئاریشە.

توركیا دەوڵەتەكا گرنگە ل سەر ئاستێ نیڤنەتەوەیی و ل سەر ئاستی ناوچەییش، مە پێخۆشە پەیوەندیێن توركیا وعیراقێ پەیوەندیێن برایانە و دۆستانە بن، دڤێ چارچۆڤەیدا ئەم پڕ كەیفخوەشین كو پەیوەندیێن هەرێمێ كوردستانێ وتوركیا گەیشتینە ئاستەكێ گەلەك بڵند، ئالوگۆڕیا بازرگانی د ناڤبەرا توركیا و عیراقێ نزیكەی 12 ملیارێ و80٪ ل هەرێما كوردستانێ دایە. وەك ئەم دبینین ناوچا رۆژهەڵاتا ناوەڕاست گۆڕانكاریێت مەزن د پێشن و ڕوودانە، ئەم ب گەرمی پشتەڤانیا ل وان میللەتا دكەین كو ژ بو ئازادی وسەربەستیا خو خەباتێ دكن، و ب گەرمی پشتەڤانیا خەباتا میللەتێ سوریا دكەین بۆ ئازادیێ و ڕزگاربوونێ، جهێ داخەكا گرانە ڕۆژانا ئەم شاهیدێ كوشتنا خەڵكەكێ یەكجار زۆر دبین ل سوریایێ وئەم هێڤیدارین هەرچی زووتر ئەڤ خوین ڕێتنە بهێتە ڕاوەستان ومیللەتێ سووریا بڕیارێ چارەنڤیسا خوە بدەن.

ئەم زۆر تەقدیرا دەورێ توركیا دكەین كو دەرگەهێن خوە ڤەكری بۆ خەڵكێ لێقەوماوێت سووریا و ئاوارەیێن كو هاتین بو توركیا و ئەڤە ساڵا1991 و1988 بیرا مە دئینیتەڤەوە، دیسان میللەتێ توركیا دەرگەهێن خو بەرامبەر خەڵكێ مە ڤەكر وەختێ تووشی ئەنفال وكیمیاباران بووین، من دڤێ سوپاسێ میللەتێ توركیا بكەم بۆ ئەڤ دۆستایەتی وبرایەتییە كو نیشانێ مە دای.

ئەڤرۆ نزیكا 29 هەزار برایێت مەیێ ئاوارەیێ سووریا مێهڤانێت مەنە و دەرگەهێ مە ژی ژبو ئەوان ڤەكرییە، ب خێر بێن هندی كو بێن ئەم ل خزمەتێ وان داینە.

د دوماهیادا جارەكا دی سوپاسیا وە دكەم بۆ داوەتكرنا مە و هێڤیا سەركەفتنێ بۆ كۆنگرا وە دخازم و هەر سەرفیراز و سەركەفتی بن.






SOURCE:: KRP PAGE HIT:: 1607