په‌یڤا سه‌رۆكێ هه‌رێما كوردستانێ ل رێوڕه‌سما بیرئانینا ئه‌نفالا بادینان


KRP.org | |


02/09/2012
بناڤێ‌ خودێ‌ مه‌زن و دلۆڤان

خوشك و برایێت به‌ڕێز..كه‌سوكارێت ئه‌نفالا

سه‌لامێت خودێ‌ ل سه‌ر وه‌ هه‌میا بن..

پێش هه‌ر تشته‌كی ئه‌ز ده‌ستخۆشیه‌كا گه‌رم ل وه‌زاره‌تا كاروبارێت شه‌هید و ئه‌نفالا دكه‌م، بۆ ره‌خساندنا ڤان ده‌رفه‌تا و یادكرنه‌ڤا ئه‌ڤ یادێت هۆیێت دلته‌زین و سوپاسیا هه‌می براده‌رێت كو ماندی بوی بۆ ئاماده‌كرنا ڤێ‌ بیره‌وه‌ریێ، سوپاسیا هه‌میا دكه‌م.

خوشك و برایێت به‌ڕێز.. برینا ئه‌نفال و كیمیابارانێ‌ برینه‌كا زۆرا كویره‌، برینه‌كا كویره‌ و زه‌حمه‌تیشه‌ بێته‌ ساڕێژ كرن، به‌س لازمه‌ نه‌هێته‌ لبیركرن نه‌ بۆ هندێ‌ یه‌ كو ئه‌م خۆ و ملله‌تێ‌ خۆ فێره‌ تۆله‌ڤه‌كرنێ‌ بكه‌ین، به‌لكی بۆ هندێ‌ نابیت بهێته‌ لبیركرن جاره‌كادی دووباره‌ نه‌بنه‌ڤه‌ ئه‌ڤ كاره‌ساته‌، وه‌ئیللا گه‌لێ كوردستانێ‌ بلندترین و مه‌زنترین و مرۆڤانیترین ده‌رس نیشا هه‌می دنیایێ دا وه‌ختێ‌ راپه‌ڕینا 1991ێ‌، دوو فه‌یله‌قێن جه‌یشێ‌ عیراقی، ئه‌و جه‌یشێ‌ ئه‌ڤ هه‌می تاوانه‌ ئه‌نجامدای، زۆر ل وان ئه‌و بووینه‌ یێت ل ڤێ‌ قه‌لعێ‌ دا ئه‌و خه‌لك شه‌هید كری، ل هه‌له‌بجه‌ خه‌لك كیمیابارانكری، كه‌فتنه‌ ده‌ستێ‌ گه‌لێ‌ كوردستانێ و كه‌سوكارێت ئه‌نفالا، قه‌سه‌یه‌كا نه‌خۆشیش نه‌گۆته‌ ئێكێ وهه‌می ئزندان، به‌س بۆمن بینن، لكێرێی دنیایێ ملله‌ته‌كێ‌ دی بڤی ره‌وشته‌ی و بڤی ئه‌خلاقه‌ی و بڤان بیروباوه‌رێت مرۆڤاتی دێ په‌یدا بیت؟، ئه‌ڤه‌ ته‌نها گه‌لێ‌ كوردستانێ‌ كو ڤێ‌ بكه‌ت، مه‌ خه‌لكێ‌ دیش دیت، رۆژه‌كێ‌ كو ده‌رفه‌تێن خۆ دیتن سه‌رێ‌ ئێك و دوو بڕی، به‌لێ‌ بابێ‌ چه‌ند زارۆكێت ئه‌نفالكری، یان برایێ وی، ئه‌و عه‌سكه‌رێ‌ كو كوڕێ‌ وی و برایێ وی ئه‌نفالكری، دا نانی ده‌تێ‌ و دا ئحتیرامێ‌ لێ‌ گریت، ملله‌تێ‌ كورد بڤێ‌ ئه‌خلاقێ‌ به‌رز بره‌ڤه‌، لبه‌ر هه‌ندێ‌ دبێژم: ملله‌تێ‌ كورد پێویستی بهه‌ندێ‌ نیه‌ كه‌س ده‌رسه‌كێ‌ بده‌تێ‌ یان شیره‌ته‌كێ‌ لێ بكه‌ت، به‌لكی هه‌میا پێویستیا بهه‌ندێ‌ هه‌ی بێن ل ملله‌تێ‌ كورد فێری ره‌وشت و لێبورین و پێكڤه‌ژانێ ببن، به‌س نابیت بهێته‌ لبیر كرن، گه‌نجێت مه‌ و خه‌لكێ‌ لازمه‌ بزانن كو ئه‌ڤ هه‌می شه‌هیده‌ و ئه‌ڤ هه‌می قوربانیدانه‌ ئه‌ڤ وه‌زعه‌ بۆمه‌ درستكریه‌، هه‌زاره‌ها گه‌نج ئه‌ڤه‌ جه‌نازێت وان، هه‌نده‌كێت هاتیه‌ دیتن و به‌شێ‌ هه‌ره‌زۆریش نه‌هاتینه‌ دیتن، ئه‌و یێت چووی دا ئه‌وێت مایی بمینن.

بێگومان كاره‌كێ‌ زۆر دڤێت، ئه‌مما حكوومه‌تا هه‌رێمێ‌ و ب تایبه‌تی وه‌زاره‌تا كاروبارێت شه‌هید و ئه‌نفالا پێدڤیه‌ كاره‌كی رۆژانه‌ بكه‌ن بۆ هه‌ندێ‌ ئه‌ڤ تاوانه‌ ب جینۆساید بهێته‌ ناساندن لسه‌ر ئاستێ‌ نێڤ نه‌ته‌وه‌یی، هه‌رچه‌نده‌ جهێ‌ پێزانینه‌كا مه‌زن بو كو په‌رله‌مانێ‌ عیراقێ‌ ئه‌و بڕیاردا و وه‌ك جینۆساید هاته‌ ناساندن، به‌س لازمه‌ لسه‌ر ئاستێ‌ نێڤ نه‌ته‌وه‌ییش ئه‌ڤ تاوانه‌ ب جینۆساید بهێته‌ ناساندن.

دژمنێ‌ گه‌لێ‌ كوردستانێ‌ فه‌رق و جودایی نه‌كر هه‌ر ل زاخۆ هه‌تا خانه‌قینێ‌، هه‌ر چ ده‌ستێ‌ وی گه‌هشتێ‌ شه‌هیدكر، ئه‌نفالكر، كیمیابارانكر، لازمه‌ ئه‌ڤه‌ ده‌رسه‌ك بیت بۆ مه‌ وه‌كو كورد، ئه‌گه‌ر كه‌سه‌ك ب شێوه‌یه‌كێ‌ دی بیره‌كێ‌ بكه‌ته‌ڤه‌، حه‌قه‌ بیرا خۆ لڤێ‌ بینته‌ڤه‌، ئه‌گه‌ر ئه‌میش فه‌رق و جوداهیێ بێخینه‌ به‌ینا خۆ، دژمن نائێخیته‌ به‌ینا مه‌، چ جارا دژمن نه‌هاتن لسه‌ر چ مه‌سه‌لێت دی ولاتێ‌ مه‌ وێران بكه‌ن، نه‌ موشكیله‌كا ئایینی مه‌ هه‌بوویه‌، نه‌ موشكیله‌كا مه‌زهه‌بی مه‌ هه‌بوویه‌، نه‌ موشكیله‌كا ئابووری هه‌بوویه‌، ته‌نها و ته‌نها هه‌بوونا مه‌ وه‌كی كورد تاوان بوو، ڤێجا ئه‌ڤ كورده‌ چ دینه‌ك و چ مه‌زهه‌به‌ك و چ ئایدۆلۆجیایه‌ك و خودانێ‌ چ ئایدۆلۆجیه‌كێ بووبیت، بنسبه‌تا وان تاوان بوویه‌، مادام تو كوردی مسته‌حه‌قی كوشتنێی.

بۆ هه‌ندێ‌ كو جاره‌كادی ئه‌ڤ تاوانه‌ دووباره‌ نه‌بنه‌ڤه‌، ئێكڕێزییا ملله‌تێ‌ كورد مه‌رجێ‌ سه‌ره‌كییه‌، هشیارییا ملله‌تێ‌ كورد مه‌رجێ‌ سه‌ره‌كییه‌، و ئه‌لحه‌مدولیللا ئه‌ڤرۆ دنیا پشته‌ڤانه‌ بۆ ملله‌تێ‌ مه‌، زه‌حمه‌ته‌ جاره‌كا دی كه‌سه‌ك ئه‌و ده‌رفه‌ت بۆ بهێت كو وه‌بكه‌ت، هه‌ر چه‌نده‌ ره‌نگه‌ كه‌سه‌ك هه‌بن نۆكه‌ش بیر ل هه‌ندێ‌ بكه‌نه‌ڤه‌ گه‌ر ده‌رفه‌ت بۆ ببیت، ئینشه‌للا ئه‌و رۆژ چوو، ئه‌و رۆژ چوو كو جاره‌كا دی كاره‌ساته‌كا هۆ بسه‌ر ملله‌تێ‌ كورد بهێت، به‌س دیسا لازمه‌ ئه‌م دهشیار بین، ئه‌م دهشیار بین بۆ هه‌ندێ‌، ئه‌گه‌ر كه‌سه‌ك بیرێ بكه‌ته‌ڤه‌، بۆ ده‌ستهه‌لات نه‌بیت و پێ چێ نه‌بیت وێ‌ بكه‌ت.

ئه‌م لازمه‌ سوپاسییا خودێ‌ مه‌زن بكه‌ین و سوپاسییا خۆڕاگرییا ڤی ملله‌تێ‌ قه‌هره‌مان بكه‌ین، خوشك و برایێت به‌ركه‌فتی.. كه‌سوكارێت ئه‌نفالا.. ئه‌ڤه‌ ڤێ‌ گاڤێ‌ كو مه‌ ئه‌ڤ پیشانگه‌هه‌ دیتی ئه‌ڤ هه‌می وێنێت دلته‌زین و یێت كو خوینێ‌ ل جه‌رگێ‌ مرۆڤی تینن ئینسان ببینیت، زۆر لێ‌ ژن و زارۆك بین، خۆ پێشمه‌رگه‌ نه‌بین ئه‌وێت كو جه‌نازێت وا نۆكه‌ لڤێ‌ پیشانگه‌هێ نیشاندای، به‌س ببینن ئه‌و ل نك خودێش مه‌رته‌با وانا مه‌زنه‌ و شه‌هیدن و یێ د دلێ‌ ملله‌تێ‌ خۆدا دژین، هنگیش سه‌ربه‌رزن، سه‌ربلندن، بۆ هه‌ركه‌سه‌كێ‌ شه‌ره‌فه‌ ئه‌گه‌ر ل دویرڤه‌ڕاش ئێكێ ل هنگو ببینێت، به‌س چاره‌نووسا وان موجرما ببینن چ بسه‌رێ‌ وان هات؟، ئه‌ڤه‌ جهێ‌ خۆشحالیێیه‌، و ل عه‌ینی وه‌ختدا جهێ‌ داخه‌كا گرانه‌، به‌س خۆ مرۆڤ دبینیت هنگ گه‌هشتنه‌ كێرێ، و دژمنێ‌ هنگو چ بسه‌ری هات، مرۆڤ دڤێت شوكرانییا خودێ‌ بكه‌ت، سوپاسییا خودێ‌ بكه‌ت ئه‌ڤه‌ بسه‌رێ‌ وان هات، و ئه‌ڤه‌ ده‌رسه‌كه‌ بۆ هه‌می زالمه‌كی، هه‌ر زالمه‌ك كو بڤی شكله‌ی زولمێ‌ بكه‌ت و غه‌درێ‌ ل ملله‌تكێ‌ فه‌قیر و بێ ده‌ستهه‌لات وهه‌ژار بكه‌ت، ملله‌ت دێ‌ سه‌ركه‌ڤیت، زالم دێ‌ تێچیت.

جاره‌كادی سه‌لامێت خودێ لسه‌ر وه‌ هه‌میا بن، و ئینشه‌للا كوردستان دێ‌ هه‌را ئاڤا بیت و خودێ‌ دێ‌ سه‌برێ‌ ده‌ته‌ وه‌ و مه‌ هه‌میا و شه‌هیدێت مه‌ش ئینشه‌للا جهێت وان به‌هه‌شتا به‌رینه‌ و زۆر سوپاس.






SOURCE:: KRP PAGE HIT:: 1329