سەرۆكی هەرێمی كوردستان پێشوازی لە سكرتێر و ئەندامانی تازەی سەركردایەتیی پارتی دیموكراتی كوردستان لە سوریا كرد


KRP.org | |


09/04/2014
ئەمڕۆ چوارشەممە 9ـی 4ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە سعود مەلا سكرتێری تازەی پارتی دیموكراتی كوردستان لە سوریا و ئەندامانی سەركردایەتیی ئەم پارتە كرد و لەگەڵیاندا كۆبۆیەوە.

لە كۆبوونەوەیەكدا سەرەتا سكرتێری تازەی پارتی دیموكراتی كوردستان لە سوریا سوپاسی سەرۆك بارزانی كرد بۆ ڕەخساندنی ئەم دیدارەدا و كورتەیەكی لە ئەنجامەكانی كۆنگرەی یەكێتیی سیاسی و دروستبوونی پارتی دیموكراتی كوردستان لە سووریا و ئەرك و ڕاسپاردەكانی ئەم كۆنگرەیەی خستەڕوو و سەرۆك بارزانی لە سەركەوتنی كۆنگرەكە ئاگادار كردەوە. هەر لەم كۆبوونەوەیەدا ئەندامانی سەركردایەتیی سووریا بەم بۆنەیەوە پیرۆزبایییان ئاراستەی خۆیان و گەلی كورد و سەرۆك بارزانی كرد و بەڵێنیان بۆ سەرۆك بارزانی و گەلی كورد دووپاتكردەوە كە لە خزمەتی ڕێبازی كوردایەتی و بەرژەوەندییە نەتەوەییەكانی گەلەكەیاندابن. سكرتێر و ئەندامانی سەركردایەتیی پارتی دیموكراتی كوردستان لە سووریا سوپاسی سەرۆك بارزانیان كرد كە پاڵپشتی خوشك و برایانی كورد لە سووریا بووە و پاڵپشتیی سەرۆك بارزانیان بە هۆكارێكی بەهێز زانی بۆ بەرەوپێشەوەبردنی دۆزی ڕەوای گەلی كورد لە سووریا.

لە بەرانبەردا سەرۆك بارزانی پیرۆزبایی خۆی ئاراستەی گەلی كورد و شاندی میوان كرد بە بۆنەی سەركەوتنی كۆنگرە و ئەنجامەكانی كۆنگرەكەیان و هیوای خواست كە لە ئەرك و كارەكانیاندا سەركەوتوو بن. سەرۆك بارزانی لە وتەیەكدا باڵی كشاندە سەر ئەوەی كە بیروباوەڕی بێگەردی كوردایەتی ئێمەی لەدەوری یەكتر كۆكردووەتەوە و وێڕای ئاماژەدان بە خەباتی گەلی كورد لە سووریا ئەوەی خستەڕوو كە ئێمە هەر چییەك بكەین ناتوانین قەرزی گەلی كورد لە سووریا بدەینەوە چونكە لە ڕۆژانی تەنگانەدا یارمەتی شوڕش و خەباتی بزووتنەوەی ڕزگاریخوازی كوردستانیان داوە و ئەو دڵسۆزیی و خەمخۆرییەیان جێگەی شانازییە.

سەرۆك بارزانی لە درێژەی قسەكانیدا داوای لە سكرتێر و ئەندامانی سەركردایەتیی تازەی پارتی دیموكراتی كوردستان لە سووریا كرد ئەم سەركەوتنە و ئەنجامەكانی كۆنگرە بپارێزن و برایانە و كوردپەروەرانە لەگەڵ یەكتردا بن و ئەركی سەرەكییان ئەوە بێت كە نەهێڵن ئەو فرسەتەی لە كوردستانی سووریا بۆ گەلی كورد هاتووەتە ئاراوە بەفیڕۆ بچێت. سەرۆك بارزانی ئامادەیی تەواوی خۆی و هەرێمی كوردستانی ڕاگەیاند بۆ پاڵپشتیكردنی پارتی دیموكراتی كوردستان لە سووریا و هێمای بەوەدا كە بۆ مامەڵەكردن لەگەڵ دۆخی سیاسیی سووریا و ڕۆژئاوای كوردستان لەناو خۆیاندا هەر بڕیارێك بدەن پاڵپشتیتان دەكەین. سەرۆكی هەرێمی كوردستان لە كۆتایی قسەكانیدا ئاییندەی گەلی كوردستانی بە گەش و پڕئومێد وەسف كرد و ئەوەی خستەڕوو كە گۆڕانكارییەكانی ناوچەكە و جیهان لە بەرژەوەندیی گەلی كوردستانە و پێویستە هەموومان سوود لەم دەرفەتانە وەربگرین كە بۆ گەلەكەمان هاتووتە ئاراوە.





SOURCE:: KRP PAGE HIT:: 190